"Энэ үйлчлүүлэгч яагаад чухамхүү манай компанитай болон надтай харилцаж байна вэ?" гэсэн асуултад хариу өгөхгүйгээр бүтээгдэхүүнээ худалдах тухай саналыг түүнд хэзээ ч бүү тавь. Үйлчлүүлэгч ямар ашиг олж буйг хариулт өгөх учиртай. Уг хариулт таны бус харин үйлчлүүлэгчийн тань ашиг сонирхлоос үүдэн гарах ёстой. Үйлчлүүлэгч илүү сэтгэл ханамжтай болох эсвэл та түүний асуудлыг шийдвэрлэж өгөх юм уу энэ хоёрын аль аль нь байсан цагт л тэрээр таньтай харьцах болно. Үйлчлүүлэгч өөрийнхөө бизнест юм уу өөртөө хувьдаа ашиг л олох учиртай. Энэ хоёр харилцан уялдаатай.

Жишээ нь, бизнесийн ашиг орлого нь шинэ бүтээгдэхүүнийг эртхэн шиг зах зээлд гаргахад орших бөгөөд тэр цагт компани нэмэлт борлуулалтаас сая саяын ашиг олох болно. Харин үүний ачаар үйлчлүүлэгч ажил албандаа ахин дэвшиж байвал тэр нь хувийн ашиг тус болно.

Худалдан авсан зүйл нь үйлчлүүлэгчийн таашаалд нийцэж буй тийм тохиолдлуудад мөн ийм жишээг иш татаж болох юм. Жишээлбэл, шатдаг хий юм уу халаалтын зуух борлуулж буй чадварлаг худалдагч тухайн зүйлийг худалдан авсанаар гэр орон ямар их "дулаан, ая тухтай" байхыг үйлчлүүлэгчид итгүүлэн үнэмшүүлж чадна. Харин ийм чадваргүй хүн бол тухайн зуухны хүчин чадлыг килокалориар яриад байхаас хэтрэхгүй. Хэрэв таны бүтээгдэхүүн үйлчлүүлэгчид тулгамдсан асуудлыг шийдвэрлэж байвал та түүнд тухайн бүтээгдэхүүнийхээ үнэ цэнийг "доллар болон центээр" харуулах хэрэгтэй. Жишээлбэл, тооцоолон бодох машины шинэ программ нь зочид буудлын үйлчлүүлэгч компьютераар дамжуулан холбоо барихдаа телефон утсыг ашиглаж буй цаг хугацааг маш нарийн бүртгэж, энэ үндсэн дээр тооцоогоо хийхэд тус болж байна гэж бодъё. Уг программ үнэхээр тийм бол үйлчлүүлэгч үүний ачаар зочид буудлын өрөө тус бүрээс өдөр болгон хоёр долларын нэмэлт орлого олох учраас тэрхүү программыг олж авахыг хүсэх болно.

Үйлчлүүлэгч юуны учир өөрийнх нь бүтээгдэхүүн, үйлчилгээг авах учиртай вэ хэмээсэн асуултад "борлуулах увидастан" хариу өгөхдөө үйлчлүүлэгч тийм үйлчилгээг авбал эдийн засгийн ямар ашиг тустай байх, аваагүй бол юугаараа хохиролтой байхыг нь бодож тооцоолдог. Тэрчлэн үйлчлүүлэгч хувьдаа ямар ашиг олж болохыг ч харуулдаг.

"Борлуулах увидастан" өөрийгөө үйлчлүүлэгчийн байранд тавьж, "Хэрэв би үйлчлүүлэгч байсан бол энэ бүтээгдэхүүн надад юугаараа ач тустай байх вэ?" гэсэн асуултад хариу өгдөг.