Батлан даалтын гэрээгээр батлан даагч нь үүрэг гүйцэтгэгч өөрийн үүргийг гүйцэтгэж чадна гэж зээлдүүлэгчийн өмнө баталж, гүйцэтгэхгүй бол өөрөө хариуцах үүрэг хүлээнэ.

Батлан даалтын онцлог нь зээлдэгчийн үндсэн үүрэг буюу зээлийг төлж дууссанаар дуусгавар болдог.

Батлан даагч нь гэрээнд заасан хэмжээгээр зээлдэгчийн дараахь төлбөрийг төлнө. Үүнд: үндсэн өр, гэрээнд заасан бол алданга торгууль, гэрээг дуусгавар болгохтой холбогдон гарсан зардал, шүүхийн зардал, гэрээнд өөрөөр заагаагүй бол үүрэг гүйцэтгэгчийн үндсэн гэрээний дагуу төлөх ёстой хүү.

 

"Банк эрх бүхий хуулийн этгээдийн мөнгөн хадгаламж, төлбөр тооцоо, зээлийн үйл ажиллагааны тухай хууль"-ийн 28-р зүйлд Батлан даагч нь санхүүгийн хувьд уг зээлийн төлбөрийг хийх чадвартай үл хөдлөх, хөдлөх эд хөрөнгөтэй этгээд байна. Батлан даагчийн санхүүгийн чадварын талаар үйлчлүүлэгч банк, мөнгөн хадгаламжийн үйл ажиллагааг эрхлэх эрх бүхий этгээд, улсын бүртгэлд бүртгэсэн байгууллага тодорхойлолт гаргаж болно гэж заасан бөгөөд мөн уг хуулийн 23-р зүйлийн 5-д зээлийн батлан даагчийн үйлдвэрлэлийн хүчин чадал, үйл ажиллагааны талаар зээлдэгчийн нэгэн адил судална гэж заасан байдаг. Энэхүү заалт бол Батлан даалтын гэрээний хувьд хуулиар тодорхойлж, тавигдсан шаардлага тул үүнийг анхаарч хэрэгжүүлэх явдал нь уг гэрээний хүчин төгөлдөр байх, Батлан даалт үр нөлөөтэй байхын гол үндэс мөн. Батлан даалтыг зээлийн гэрээний үүргийн гүйцэтгэлийг хангах арга болгон хэрэглэсэн тохиолдолд зээлийн ажилтан нь зээлийн гэрээтэй холбоотойгоор түүний хэрэгжилтэнд сайтар хяналт тавьж ажиллах шаардлагатай. Батлан даалтанд анхаарах асуудлууд нь:

• Батлан даалтын гэрээ байгуулснаас хойш зээлийн гэрээний нөхцөлийг өөрчилсөн тохиолдолд батлан даалтын гэрээнд мөн адил уг нөхцөлийг тусгуулахаар батлан даагчид мэдэгдэх шаардлагатай.
• Батлан даагчид зээлдэгчийн зээлийн гэрээний үүргийн биелэлтийн талаар тогтмол үнэн зөв мэдээлэл өгч байх хэрэгтэй.
• Тэгэхгүй тохиолдолд батлан даагч нь үүргээсээ татгалзах эрхтэй бөгөөд банк батлан даагчаас зээлдэгчийн зээлийн төлбөрийг гаргуулахаар шаардах эрхээ алдана гэж Иргэний хуульд заасан байна.
• Батлан даагчид зээлийн нөхцөл, зээлийн хүү тооцох аргачилал, батлан даалтын гэрээний талаар үнэн зөв ойлголт өгөх хэрэгтэй.

Зээлд эд хөрөнгө барьцаалахад итгэмжлэл, хамтран өмчлөгчдийн зөвшөөрөл гэсэн ялгаатай хоёр ухагдахуун гарч ирдэг. Практик дээр ажиглаж байхад зээлийн ажилтнууд эдгээрийг ялгаатайгаар ойлгохгүй байх нь бий.